सकाळी नेहमीप्रमाणे आवरून ऑफिसला पोचले, तर शुकशुकाट! आज ऑफिसला सुट्टी होती आणि मला तंद्रीत ते माहितीच नव्हतं! क्षणभर काय करावं प्रश्न पडला. दोन मिनिटं तिथेच थांबून लगेच पडलेल्या प्रश्नावर विचार केला आणि युक्ती सुचली.

उत्सवी गंधाच्या दरवळाची सुंदर हवा होती, भुरुभुरू पाऊस होता, ओलसर झालेला कर्वे रस्ता बराचसा रिकामा होता आणि अनपेक्षितपणे अशी अचानक मिळालेली सुट्टी :-) मिरवणुकीचे गणपती रांगेला लागायला बराच वेळ होता अजून. मात्र तरी वर्दळ अगदीच तुरळक होती.

गाडी वळवून कर्वे रस्त्यावर छानपैकी भटकले. डेक्कन कॉर्नर ते पौड फाटा. रमत गमत, उगीचच रेंगाळत, निवांतपणे चार घिरट्या घातल्या. इतकं प्रसन्न वाटत होतं की बस्स! :-) अशी पर्वणी क्वचित मिळत असेल. ठरवलं तरी हे साधता यायचं नाही.

अशावेळी हातातल्या दुचाकीचा आनंदही द्विगुणित होतो.

त्या क्षणी हातात सायकल असती तर आणखी आनंद मिळाला असता, पण हरकत नाही! फिर कभी!!

अनंत चतुर्दशी, अशीही :-)

गणपतीबाप्पालाही माझा हेवा वाटला असेल नक्कीच :-)