'कलके सपने आज भी आना' - डॉ. लता

एक शेतकरी एके सकाळी त्याच्या तीन मुलांना बोलवून त्यांच्या हातावर एकेक रुपया ठेवतो आणि सांगतो, ह्यामधून संपूर्ण घर भरून टाका. तिघांतला एक मुलगा त्या एक रुपयातून काही उद्बत्त्या आणतो आणि सगळं घर त्या सुगंधाने भरून प्रसन्न करून टाकतो. लहानपणी अनेकदा ऐकलेली ही गोष्ट आज सकाळी अचानक आठवली.

अगदी तसं, लताचं 'कलके सपने आज भी आना' ऐकताना सगळं घर त्या रसरशीत स्वरांनीआणि प्रसन्नतेनं भरून गेल्यासारखं वाटतं. त्यातही जर सकाळी सकाळी कानावर अशी प्रफुल्लित लता आली तर त्या आवाजातला रेमेडी, थेरपी, हा गुणधर्म जास्त प्रकर्षाने जाणवतो. यू अ‍ॅक्चुली फील ट्रीटेड. हे अख्खंच गाणं सुंदर आहे, पण त्यातही 'झूमते बादल गाते झरने'च्याआधी लता दोन छोटे आलाप उतरून पुन्हा 'झुम'ला एक मुरकी घेते, तेव्हा ती मुरकी वहिदानंही हातानं दाखवली आहे आणि त्याआधी छोट्या आलापांनाही वहिदा खरंच उतार उतरत आली आहे. ती तेवढी जागाच अफलातून आहे. चित्तवृत्ती फुलणे हे क्रियापद बहुदा कादंब-यांमध्येच वाचायला मिळणारं, पण हे गाणं ऐकताना आणि पहातानाही त्या क्रियापदाची अनुभूती प्रत्यक्ष घेता येते, इतकी ही लता-वहिदाची युती सूरदेखणी आहे. शकील बदायुनी आणि नौशादमियाँनाही कुर्निसात आहेच, त्यांना विसरून कसं चालेल!

https://www.youtube.com/watch?v=QbRkEAueb24