माझ्या घरची आकाशनिंबाची फुलं..

एरवी सप्टेंबरअखेरीसच क्षीण होत होत निरोप घेणारी बुचाची फुले यंदा मध्यंतरात घेतलेल्या थोड्या विश्रांतीनंतर नोव्हेंबरच्या मध्यावरही पुनश्च जोमाने फुलारलीयेत! खुप महिन्यांनी घराच्या परिसरात फिरकले आणि अनपेक्षितपणे माझं घमघमीत प्रसन्न सड्यानं स्वागत झालं.. जीव हरखूनच गेला. मी म्हणलं, तुम्ही, आत्ता यावेळी कसे.. फुलं म्हणाली, बाई तुझ्या अंगणात होत असलेला हवामानबदल जाणवत नाही का तुला.. नेहमी हवामानबदल हा चिंतेचा विषय असतो, पण त्यामुळे मिळालेला हा सुखद धक्का मात्र हवाहवासा आहे..
काहीही असो, पण स्वत:च्या हातांनी लावलेल्या झाडांचा बहर वेचण्याचा आनंद निराळाच..

सर्वात आवडती १० हिंदी मिश्र गीते -

मला माणूसजातीच्या भुतांची भिती वाटत नाही.. पण शैलजा रेगेमुळं आवडत्या गाण्यांची, मी त्यांच्यावर साफ अन्याय केल्यामुळं संतापून जी भुतं मनावर नाचणारेत, त्यांची जाम भिती वाटतेय.. आत्ता मघापासून बसलेय तर कुणी सारखी 'आणि मी?', 'मी गं!', 'आता माझा नंबर ना?', 'कसली वाईट आहेस गं!! नुसतीच माझं आवडतं, माझं खुप आवडतं म्हणत असतेस होय..', असा आरडाओरडा करतायत, तर कुणी फक्त शांतपणे आपला नंबर नक्की कधी म्हणत माझी तारांबळ बघतायत. खाली पहिली 10 गाणी लिहीण्यापूर्वी ही चुळबूळ करणारी, रांगेत शांत उभी राहिलेली गाणीही नमूद करायला पाहिजेत.. त्यात 'अभी ना जाओ छोडकर', लताचं 'आज की रात न जा', कुमारांचं 'निक्के निक्के तारनहारी', मुकेशचं 'आंसूभरी है ये जीवन की राहें', कैलास खेरचं सैंया, रेहमानचं हायवेतलं 'माही वे', नव्या अग्निपथमधलं सोनू निगमचं 'अभी मुझमें कहीं' आणि रूपकुमार राठोडांचं 'ओ सैंया'.. बाप रे! आणखी खुप आहेत.. असो.. ही माझी आवडती पहिली 10 गाणी -

1. मिला है किसीका झुमका - परख - लता
2. ऎसे तो ना देखो - महंमद रफी
3. नन्ही कली सोने चली - गीता दत्त
4. अवधूता - कुमार गंधर्व
5. सलौनासा सजन है - आशा
6. कून फाया कून - मोहीत चौहान, रेहमान
7. तूही रे - हरीहरन
8. ये तनहाई हाए रे हाए - लता
9. सीनें में सुलगते है अरमां - तलत, लता
10. बाजे मुरलीया बाजे - लता आणि भीमसेन जोशी

कोबी-पालक दडपे पोहे

थोडे गरम केलेले पातळ पोहे, कोबी, पालक, ओलं खोबरं, दोन चमचे टोमॆटो सॉस, मीठ, साखर आणि मोहरी-जीरे-हळद-हिंग-तिखटाच्या खमंग फोडणीत खरपूस तळलेले दाणे. मऊ हातानं छान कालवून लगेच खायला घ्यायचे. 

सोबत रविवार स्पेशल पुरवण्या असतील तर क्या कहने!

किमान प्रयत्नात कमाल चवीची, ओट्याशी मुळीच रेंगाळायला न लावणारी, वाटेल ते ढकलायला स्कोप असणारी कृती. दडपे पोहे जिंदाबाद  :-)

le emoticon