कुमार नावाच्या सुखाची उद्यापासून जन्मशताब्दी. आपल्या सुरांनी कवेत घेऊन माझा तुमचा जीव शांत करणाऱ्या या विलक्षण आनंदात्म्याला कृतज्ञ अभिवादन.

आठवड्याभरापासून संगीत सरितामध्ये कलापिनी कुमारांबद्दल भरभरून बोलत आहेत. विविध भारतीचे त्यासाठी मानावे तेवढे आभार कमी आहेत. कुमाररचित माळवी बंदिशींमधले शब्द आणि कलापिनींचं वडिलांबद्दलच्या जिव्हाळ्यानं अधिकच निथळणारं मधाळ हिंदी म्हणजे दोघांच्याही गाण्याला लावलेली मनभावन झालर आहे. कुमार हा मन:स्वास्थ्यासाठी समानार्थी शब्द होऊ शकतो. देखणेपणाचे निरनिराळे प्रकार असतात. माझ्या ढोबळ मते, हवेत आनंद उधळणारी माणसं काहीशी कुमारांसारखी देखणी दिसतात.