तिकीट टू पॅराडाईज
मला हलकेफुलके रोमॅंटिक आणि सुखांत असणारे सिनेमे मनापासून आवडतात. 'तिकीट टू पॅराडाईज' त्या कॅटेगरीतला आहे. नेटफ्लिक्समुळं असे फीलगुड सिनेमे शोधणं सोपं झालं आहे.
नात्यांचा गोड-कडू-गोड असा यु टर्न घेतलेला प्रवास बघताना बरं वाटलं. सिनेमाचा संपूर्ण बॅकड्रॉपच मुळात नयनरम्य आहे, त्यात सिनेमात असलेली एकजात सगळी देखणी माणसं आपापल्या वावरानं चांगली भर घालतात.
मागे 'अ टुरिस्ट्स गाईड टू लव्ह'मधून पहिल्यांदाच अतिशय सुंदर व्हिएतनामचं दर्शन घडलं होतं. तसं यात सुरेख बाली दाखवलंय, पण प्रत्यक्षात ते चित्रीकरण ऑस्ट्रेलियातलं आहे. सी वीडची सुबक शेती, अप्रतिम रिसॉर्ट्स, रमणीय निसर्गदृश्यांची रेलचेल आहे. गोष्टीत सुंदर अर्थपूर्ण बालीनीज विवाह विधी बघायला मिळतात. मध्यंतरी 'मेड इन हेवन'च्या दुसऱ्या सीझनमध्ये बौद्ध विवाह बघायला मिळाला होता, अलीकडे रणदीप हुडाच्या लग्नाचे मणीपुरी पारंपरिक विधी बघायला आवडले होते. आता हे बालीनीज लग्न सुद्धा बघण्यासारखं आहे. ते छानपैकी गोष्टीचा भाग म्हणून येतं आणि त्या अनुषंगाने जुळवून आणलेल्या सगळ्या भानगडी सिनेमाची मजा वाढवतात. संवादांंमध्ये, प्रसंगांमध्ये सहज येणारा नर्मविनोद आहे.
सिनेमाला एक चिमुकलीशीच प्रेडिक्टेबल कथा आहे, पण ती चांगली मांडली आहे. या सगळ्या छान छान पसाऱ्यात तिच्याकडे दुर्लक्ष झालेलं नाही. अंडरटोन किंचित वेगळा आणि भ्रमंती वगळता जातकुळी ईट, प्रे, लव्हची आहे.
ज्युलिया खूपच आवडते, पण यात मला जॉर्ज क्लुनीचा बाबा जास्त भावला, तो दिसलायही मस्त. त्याच्या व्यक्तिमत्वातले दोन पापुद्रे उत्तम आणि ज्या प्रकारे घाई न करता उलगडून दाखवलेत, ते बघताना सुखद वाटतं. भांडखोर नवरा बायको वठवताना त्या दोघांनी मिळून जाम धमाल केली आहे. बीअर पॉंगच्या वेळी एक टीम झाल्यावरचा त्यांनी केलेला दंगा आणि शेवटी दोघं तोंड भरून सूचक हसत बघत राहतात ते छान वाटतं बघताना. ज्युलिया-जॉर्जचा होणारा जावई गेडे झालेल्या मॅक्झिम बुतिएच्या खळ्या तर भलत्याच गोड.
मला फार आवडला. कदाचित तुम्हालाही आवडेल.
No comments:
Post a Comment